[GALPon] Nova versión «Beta» de GALPon MiniNo

Tras moitas horas de traballo en equipo (e as que nos quedan) volvemos ter unha distribución decente para ordenadores con poucos recursos, cun novo «look» renovado, moitisimas melloras, e utilidades que agardamos que vos gusten: - Escritorio dobre, baseado en ROX-Filer (principal) e PCManfm. Con cambio ao voo. - Lxp-icewm con interesantes características extras con respecto a IceWM: miniaplicacións para controlar o volume, a enerxía da batería, a localización do teclado, selector de escritorios, aparencia máis coidada, etc. - Os menús agora actualízanse automaticamente ao instalar programas. - Temas de xanelas de deseño propio, inspirados no tema «Clearlook». moi frescos e actuais. - No escritorio agora aparecen as tarxetas e memorias USB automaticamente. - En ROX-Filer, como na anterior versión, mantemos a distribución dos elementos do menú para que sexa máis amigable, buscador (catfish incorporado), renomeador masivo (integrado tamén), abrir xanela como administrador, etc... - Tamén utilizamos FUSE para montar automaticamente arquivos comprimidos (zip, tgz, deb, iso...) e ver ou utilizar o seu contido sen ter que descomprimilos. - Así mesmo, engadimos unha barra superior de miniaplicativos para realizar tarefas puntuais ou con ficheiros de forma masiva, por exemplo: cortar/unir ficheiros, calcular a suma md5, redimensionar ou virar imaxes, queimar unha imaxe de cd, crear un CD de son, converter entre distintos formatos de vídeo e son, instalar tipos de letra no sistema...e todo iso simplemente arrastrando cara ao miniaplicativo os ficheiros que queremos tratar. - Prato forte, cun simple clic, xeración automática dun LiveCD :-) - Entre os aplicativos que podemos atopar nesta versión: abiword, mtpaint, ayttm, leafpad, fotoxx, printoxx, gliv, xmms, mplayer, mhwavedit, winff, epiphany, bashare... E, como sempre, cun especial coidado na localización de todos os programas, nesta ocasión acadamos practicamente o 100% no galego, no español e no inglés. Animamos a todo o mundo a instalar esta versión Beta e encantaríanos que nos deixásedes algún comentario, dúbida, problema, suxestión...na lista de correos en Google Groups (http://groups.google.com/group/minino-distro). Así mesmo, facemos un chamamento especial a documentadores ou afeccionados a facer tutoriales ou videotutoriales, para axudarnos a actualizar as páxinas da axuda de GALPon MiniNo. Podedes descargalas de aquí: Máquina virtual para VirtualBox http://gruvi.galpon.org/ISOS/minino-1.2-beta-i686.vdi.bz2 Imaxe en crú para envorcar a un USB http://gruvi.galpon.org/ISOS/minino-1.2-beta-i686.dd.bz2 Imaxe para gravar un CD vivo -instalador http://gruvi.galpon.org/ISOS/minino-1.2-beta-i686.iso